Woh teray naseeb ki baarisheiN

KahaN aa key ruknay thay raastay, kahaN morr thaa usay bhool jaa
woh jo mil gaya usay yaad rakh jo nahi mila usay bhool jaa


woh teray naseeb ki baarisheiN kisi aur chat pey baras gayeiN
dil-e-bekhabar meri baat sunn usay bhool jaa usay bhool jaa


mein to gum thaa tere hii dheyan mein, teri aas, tere gumaan mein
saba keh gai mere kaan mein mere saath aa usay bhool jaa


kisi aankh meiN nahi ashk-e-gham, tere baad kuch bhi nahiN hai kam
tujhe zindagi ney bhula diya, tu bhi muskura, usay bhool jaa


kyun attaa hua hai ghubaar meiN, gham-e-zindagi key fishaar meiN
woh jo darj thaa teray bakht mein, sou woh hou gaya usay bhool jaa


naa woh aankh hii teri aankh thi, naa woh khwaab hii teraa khwaab thaa
dil-e-muntazir tou yeh kis liay teraa jaagnaa, usay bhool jaa


yeh jo raat din kaa hai khel saa, isay dekh, is pe yaqeeN naa ker
nahi aks koi bhi mustaqil, sir-e-aaina usay bhool jaa


jo bisaat-e-jaaN hii ulat gaya, woh jo rastay mein palat gayaa
usay roknay se hasool kya, usay mat bulaa, usay bhool jaa


Amjad Islaam Amjad